Manchmol, ba der Nacht, wenn drinna und draußn alles finster is, af der Straß senn die Laterna aus und höchstens der Mond machts aweng hell, wenn mit Sicherheit kaans zum Fenster reischaua ko, dann tanz ich mein Tanz. Der hat ka Schrittfolge und ka Choreografie, der braucht net amol a Musik: kan Räbb und ka Polka.
Ich mach alles, wos i sunst nie derf: Ich spring und steich und schleich und stepp, ich wackl mitn Kupf und mit die Zäiher, ich roll die Hüftn und die Augn, ich streck in Hintern naus und die Zunga. Ich bin a Katz und a Kamel, ich mach a Hex und in Hampelmann - des hommer im Kindergartn glernt. Dabei bleib ich net am Teppich und alle Tassn im Schrank wackln.
Aamol bin i su arch ghupft, daß i durchn Boden nunterbrochn bin und a anderschmol hobbi solche Pirouetten dreht, daß ermi durchs Dach gschraubt und pfeilgrod in Nachthimmel neibuhrt hob. Seitdem gibi aweng obacht bam Danzn, wall: in andern Tooch hat die Dänsing Kwiin ganz schee Muskelkater ghabt.