Verbrenner wollt is,
wies ders du nemmer hom wolltst,
verbrenner in aner Babierdüdn: unser Leem.
Des bisserler Glück und die Streits,
etliche scheene Grinser und a boor gschmissne Gläser.
Etz bringi des Feier nemmer aus !
Etz hockts drin in mein Bauch,
direkt unter der letztn Ribbn,
und haaß läfft is Lava aus meine Aung.
Wall, mit aamol brennt die ganze Welt
der Wald, die Baamer und di Blummer,
die Wale und di Schneckn,
der Kees und di backner Karpfn,
di Kärwasmusik und di Trauermärsch,
des Scheene und des Graisliche,
nix bleibt iebri,
alles brennt lichterloh in mein Bauch.
Und ner bloß du könntsters löschn.