Wennst in die Gsichter schaust, sollerst net maaner, daß die Fäiß sich bewegn. Schulter an Schulter, Buggl an Buggl, Bauch an Bauch, rucklns und zucklns, schibberns und schubberns hi und her und naaf und no. Zu mehr is zu eng und ieberhabbts tät an wos fehln, wemmer zuvill Platz hätt.
"Iech alter Fraa konn doch net allaans afn Booll gäih", sacht die Nachberi etzad scho seit zeah Johr. Die Gretl obber find scho an, ders hifährt, sitzt aweng, gnabbert aweng anerer Apflschorle, leist si an Schoppn Mosel, net des saure Zeich vo dorum, und schaut und wart und plaudert aweng mit der Brunners Bowett. Die hats richtich derwischt. Der ihrer tanzt mit ärä. An Zwing und an Tango. Der wor a ganz nerrscher fräihers, hat aa amol zu oft a andere an si hidriggt. Etzad sachts ner bloß nu "Du alter Depp", wenn er anerer im Minirock und die Blattoosulln nochschaut, wenn er su a dreckerts Liedla oostimmt, af der Kerwa. Hat alles seine zwaa schlechtn Seiten. Dann läiber gor kann?
Ouh wäih, der Schellers Hans staiert af si zou: Sei Kupf hitzi-rout, der ganz Kerl dampft. Werkli hullders zur Walzerrunde. Do is er bekannt derfier. Elegant hält er sei linke Händ rückwärts beugt, do nei lecht sie ihr rechte. Und - net su schüchtern wäi die junga Borschen seitlich an der Hüftn - er hält sie fest im Kreiz, die Finger gspreizt. Rechts rum, links rum, umtschatscha, schunkeln am Platz. Sie konn an Walzer scho tanzn! Die Trompäitn schmettert und der Lautsprecher scheppert. Kaum versteht mer, wos der Kapellmassder singt.
Der hat scho zeah schwarze Mooßn baggt und wird uma Aans vo seiner Fraa abghullt. Jeds Wochenend is des su im Summer bis in Herbst nei. Wenn halt die Kärwana senn. Unter der Wochn amol a Beerdigung und sunst im Betrieb. Noja, do kummt scho aweng wos rei. Do konner in Boum aweng wos gem fiern Bau und im Januar fliegns in Urlaub. Wohi, wous warm is. Friern konner aa derhamm. Vorerscht schwitzt er fraali vom Akkordeon-Zieng. Su allmählich konner den Lautsprecher aweng leiser stelln, die Tiesch leern si, die Leit schlorchern nachanander hamm. Wenn er in die Gsichter schaut vo die Tanzpaare, konn er immer kaum glaabn, daß ihre Fäiß sich bewegn. Su regungslos.